An de 15. November wurren in de Oostfreeske Landskupp weer de Uttekens „Mehrsprakig Kinnergaarn“, „Mehrsprakig Grundschool“ und „Platt is cool“ vergeven. Siet 2006 wurren bit nu 34 Kinnergaarns un 9 Scholen as mehrsprakig uttekent, 10 Scholen mit de Utteken Platt is cool. Kinnergaarns un Scholen, de in de Olldag mit verscheden Spraken arbeiden, könen sük all twee Jahr um de Utteken bewarven. För de uttekent Inrichtens gifft dat denn en Plakette för de Huuswand, en Urkunn un 250 Euro. Bi disse Utteken geiht dat neet blot um Plattdüütsk, belangriek sünd ok de Herkunftsspraken van de Kinnergaarn- un Schoolkinner. Wichtig is ja, daar villicht de hele Familien beter in de düütske Olldag mit intobinnen. In de festlich Ständesaal van de Oostfeeske Landskupp wurren van Landskupppräsident Rico Mecklenburg ditmaal uttekent:
De Kinnergaarn KoolmannKids ut Nörden as mehrsprakig Kinnergaarn. Hier hebben 40 Kinner en anner Moderspraak as düütsk. De Kinnergaarn versöcht, de Herkunftsspraken van all Kinner intobinnen, dat gellt besünners för Kurdisch un Arabisch. Daarför sünd extra pädagogisk Facklüü instell worden. Heel belangriek is daarbi ok de Tosamenarbeid mit de Ollen.
De Grundschool Weener as mehrsprakig Grundschool. In de Grundschool Weener könen de Schölers van Klass 1 bit 4 Nederlandsk lehren, Kinner in de 3. un 4. Klassen könen mit Franzöösk anfangen. Up dat Rebett Nederlandsk arbeidt de School mit en nederlandske Partnerschool, de NHL Stenden Hogeschool in Leeuwarden un de EDR tosamen.
De Grundschool Pfälzerschule in Plaggenbörg (Stadt Aurerk) as mehrsprakig Grundschool. De Grundschool betreckt Plattdüütsk in de Regelunnerricht, in en Plattdüütsk-AG un in de Betreuungsstunden mit in. Plattdeutsch finnt sük in de heel Schoololldag weer, in d‘ Unnerricht, bi d‘ Sport, in de Pausen un in de Fluren.
De Westerburgschool in Emden kreeg de Utteken Platt is cool. In de Westerburgschool worden de Spraken Türkisch un Plattdüütsk mit in de Unnerricht inbunnen. Eenmaal in d‘ Week gifft dat en AG Türkisch, all verde Klassen sünd bi en AG Plattdüütsk mit d’rbi. Butendeem gifft dat „De Warkstee“ – Werken up Platt. Dat hele plattdüütske Programm an de School word van blot een Mester dragen – dat verdeent en Utteken.
De KGS Großefehn kreeg de Utteken Platt is cool. In disse KGS leevt Plattdüütsk. Tominnst 15 van de 78 Mesterskes un Mesters proten allerbest Platt. In twee Klassen word regelmatik Platt proot. Elke Maandag gifft dat en Plattdüütsk-AG. Butendeem word en Wahlplichtkurs Plattdüütsk van Klass 6 of an anboden. De Plattdüütsk-Fachkraft van de School nimmt bi de „Qualifizierungskurs Niederdeutsch“ van dat Landesamt för Schule und Bildung deel.
Wi freien uns, dat in de oostfreeske Kinnergaarns un Scholen so vööl un so good mit Spraken arbeidt word, denn: De Tokunft is mehrsprakig!